الايفون بقي ضد السرقة تماماً ! مستحيل يتسرق

13 ديسمبر 2023آخر تحديث :
الايفون بقي ضد السرقة تماماً ! مستحيل يتسرق بعد التحديث الجديد ! تحديث ايفون العبقري الجديد

الطبيعي والقديم اللي انت عارفه ان الحرامي لو سرق الايفون اول حاجة بيعملها انه بيقفل الجهاز علطول وابل عامله خاصية ان حتى لو الجهاز مقفول بتقدر تعرف مكانه من خلال ان الجهاز بيتواصل مع الاجهزة اللي حواليه من خلال إشارات لاسلكية وتقدر تعرف مكانه بالضبط حتي لو الجهاز مقفول وده من خلال خاصية find my device.

يعني لو موبايلك اتسرق تقدر من خلال تليفون اي واحد صاحبك تحدد مكانه.

ده القديم اللي كلنا عارفينه.

اللي حصل بقا ان صحيفة wall street journal اكتشفت ان في لصوص بيطلبوا من اصحابهم يوريهم صورة معينة أو أنه يركز مع صاحبه وهو بيفتح الجهاز ويحفظ كلمة السر بتعته وبعد كده بيسرق الايفون ويقدر انه يلغي الحماية أو يلغي خاصية find my device من خلال كلمة السر المسروقة.

راحت ابل بقا عملت خاصية جديدة .

وهي stolen device protection.

ودي بتعمل طبقة حماية تانية للحماية من السرقة.

الخاصية دي لازم تكون مفعل ال location زيها زي find my device اللي احنا عارفينها.

واللي بتعمله انها بتتبع تحركاتك وبتسجلها ولو حصل والجهاز بقا موجود في مكان غير الامكان الاعتيادية اللي الموبايل بيكون فيها .

الجهاز مباشرة بيطلب بصمة الوجه اجباري عشان تعمل اي اكشن حساس زي مثلا تشوف كلمات السر المحفوظة أو تغير كلمة سر الجهاز او تلغي بصمة الوجه او تقفل خاصية find my device او تشوف وسائل الدفع المحفوظة على الجهاز او تعمل فورمات.

مش بس كده الحرامي لازم يستنى ساعة كاملة عشان يقدر يغير باسورد ال apple id او يحذف بصمة الوجه وكمان هيطلب منه بصمة الوجه مرة تانية عشان يعمل كده.

وساعة دي مدة كافية عشان تقدر تتصرف فيها وتشوف مكان جهازك فين وتجيبه.

وتقدر تفعل الخاصية دي من خلال الدخول على الاعدادات ثم face id and passcode ثم stolen device protection.